top of page
提到同麻雀有關既電影，唔知大家第一時間會邊一套呢？係咪劉德華主演嘅《嚦咕嚦咕新年財》呢？為咗今日可以同大家好好討論一番，小編搜羅咗幾部以麻雀為主題而較為人熟知嘅本地電影：
《打雀英雄傳》（Mahjong Heroes）（1981）
《雀聖》（2005）
《雀聖2自摸王后》（2005）
《打雀英雄傳》（Bet to Basic）（2006）
《雀聖3自摸三百番》（2007）
對比上面幾部電影嘅內容，小編發現片中總會有麻雀高手和雀壇爭霸戰嘅元素。更甚者，有啲電影嘅內容更包含賭博、地下組織、老千同爭產。講到嚟呢度，小編記起做街訪嗰陣，唔少街坊（更多係年輕嘅朋友仔）都會將麻雀同賭博掛鉤。🤔🤔咁究竟係社會先有麻雀係賭博類活動嘅印象而影響後期電影對麻雀嘅敘述，定係過去本土電影對麻雀嘅包裝影響咗社會對麻雀嘅想像呢？
《嚦咕嚦咕新年財》咁出名，小編又點可以唔講呢！😂借《嚦咕嚦咕新年財》（2002）同《雀聖3自摸三百番》（2007）做例子，小編今日想同大家討論下本地電影點樣通過麻雀傳遞社會讚頌嘅道德價值～
一句「牌品好自然人品好」加上一句「愈爛嘅牌愈要畀心機打」，令《嚦咕嚦咕新年財》成為經典。劇中，德華（劉德華飾）被咏琪（梁咏琪飾）詛咒後牌運變差，但一直保持沉著、輕鬆嘅心態，最終扭轉困局，喺麻雀大賽勝出。
另一部電影《雀聖3自摸三百番》裏面，萬金游（郭晉安飾）因為戀上會為身邊人帶嚟厄運嘅吳靚（楊思琦飾）而逢賭必輸。經高人指導之後，萬金游學識以平常心做人，而且積極面對一切厄運，最終喺麻雀局勝出，保住家產。
兩套電影入面，主人公都係無辜遇上無妄之災，之後因為良好心態逢凶化吉。製作人將唔同社會認為值得推崇嘅價值觀放到打麻雀嘅故事入面，為本地麻雀電影添上一層教化的意義。
bottom of page